Lyric Poem · Life
Sic a Wife as Willie had
by Robert Burns
WILLIE WASTLE dwalt on Tweed,
The spot they ca’d it Linkumdoddie;
Willie was a wabster gude,
Could stown a clue wi’ ony body:
He had a wife was dour and din,
O Tinkler Maidgie was her mither;
Sic a wife as Willie had,
I wad na gie a button for her!
She has an e’e, she has but ane,
The cat has twa the very colour;
Five rusty teeth, forbye a stump,
A clapper tongue wad deave a miller:
A whiskin beard about her mou’,
Her nose and chin they threaten ither;
Sic a wife as Willie had,
I wadna gie a button for her!
She’s bow-hough’d, she’s hein-shin’d,
Ae limpin leg a hand-breed shorter;
She’s twisted right, she’s twisted left,
To balance fair in ilka quarter:
She has a lump upon her breast,
The twin o’ that upon her shouther;
Sic a wife as Willie had,
I wadna gie a button for her!
Auld baudrons by the ingle sits,
An’ wi’ her loof her face a-washin;
But Willie’s wife is nae sae trig,
She dights her grunzie wi’ a hushion;
Her walie nieves like midden-creels,
Her face wad fyle the Logan Water;
Sic a wife as Willie had,
I wadna gie a button for her!
This poem is in the public domain.
“Sic a Wife as Willie had” by Robert Burns — quilloak.com/poems/sic-a-wife-as-willie-had
Keep reading
When You Are Old
W. B. Yeats · 1893
12 lines · lyric
So We'll Go No More a Roving
Lord Byron · 1817
12 lines · lyric
To the Virgins, to Make Much of Time
Robert Herrick · 1648
16 lines · lyric